又大一歲

 本來都預咗需要時間才能落腳，初心是：無論如何，寫書、讀書和看電影為先。

在香港的時候太多工作，朝早落田，下晝煮飯做家務，好多時候要接Freelance，四出遊走，之後要備課，預備一星期兩晚的課堂。當時成日同自己講，去到英國要靜下來讀書寫書睇電影。

到了四月，叫做真正落腳。從來沒有想過能擁有一間屋，門前泊車，有個細細地的後園，十五分鐘車程可以看海，三十分鐘車程就到古鎮，有湖景有山景，步調緩慢，做事專心。好耐未試過睇完一整本書，由頭到尾冇跳住讀，但過去一個月，已經睇咗《石牆生花》、《Hope of Ages Past》、《Humankind:  A hopeful history》，仲有睇咗好多戲，寫咗兩篇文畀《青芽兒》，雖然唔算好Productive，但係慢慢朝住初心進發。

直到某一晚，同細仔傾完電話，好多本來沒有憂心的事情又再浮現。於是，我好似著了魔的，覺得自己冇用、好想搵一份工，好似有份工先證明到自己一啲嘢。雖然見咗兩份工，但係每見一份工，我都會猶疑，我真係想做嗰份工嗎？除咗有穩定收入，我點解想做嗰份工？那種徬徨，唔係真實處境的困難。其實，唔使交租，有啲積蓄，兩個仔都成人，經濟壓力並唔係好大，我的生活甚至比好多本地人寬裕。但係，總之有一刻，突然失去咗安全感，好想屬於某一個機構。

原來，在一個唔熟悉的處境，先見到平時唔知的自己。以前在香港，成日覺得自己可以隨遇而安，憑雙手可以自主生活，努力做自己想做的事、整個宇宙都會幫你（係呀，牧羊少年），直到進入一種孤獨的狀態，先知內心深處仍然依賴外在的安全感。只不過人在香港的時候，那種外在保障很無形，自己一直沒有察覺。

另一個問題，亦都係沙特所講「他人即地獄」的處境。同細仔對話，便會將自己投入細仔（重要他者）的世界，父子之間，並唔係只有兒女會受到父母期望的影響，在緊密的親情中，父母都會受子女的期望影響，哪個愛兒女的父母不想提供更好的（物質）生活給子女？在愛的關係中，大家都有覊絆，不能單單成為理想中的自己。

雖然兩份工都話唔情，表面上係失望的，但內心深處，又有點竊喜。首先，當我想到真係要做嗰兩份工時，壓力便來了，我唔係真係咁鍾意揸車同僱主打交道。第二，如果要做全職，我可能要放底寫書的夢想。兩份工都失敗了，反而看清了初心，寄了信去公園古蹟做義工，做真係有興趣的事情。過去在香港的日子，我不是都是這樣活過來嗎？

先求祂的國和祂的義，天上的飛鳥也不種也不收。.又大一歲了，要再提醒自己活在信仰中。