海灘執垃圾

 終於行出第一步，參加英國港人組織的活動，去沙灘執垃圾，呢個沙灘，我幾日前先去過，好鍾意，距離屋企只係十五分鍾車程，有時食完下晝飯就去行下，水清沙幼，只不過風大咗少少，冇太陽的時候有啲凍。幾日前就係咁，本來帶咗本書諗住坐喺沙灘邊的長櫈睇下書，點知嗰日冇太陽、風又大，最後揸車去市中心，搵間Cafe睇書算了。

天氣預報話今日會落雨，但係天公造美，竟現出大陽。今日第一次喺落腳的城市見到咁多香港人，估唔到有成三十幾人報名參加，雖然冇乜傾偈，但係點下頭、打個招呼，已經好窩心。話就話執垃圾，但係英國海灘其實幾乾淨，冇乜垃圾，於是我從行人路開始，執煙頭同膠，好多本地人見我哋執垃圾，都好友善咁同我哋點頭微笑，有位伯伯見我馴熟運用垃圾夾，仲問我係咪Surgeon，我話我都想，學下英式幽默。

兩個鍾頭執咗半袋，其中一半係海洋飄上岸的膠，同香港年輕人閒談，了解佢哋近況，講少少香港時勢，未來在英國的活動，都幾開心。

到目前為止，我仲係好想做老港僑在英國的歷史研究。佢哋幾時嚟？點解嚟？點樣搵地方落腳？落腳之後又點維生？我知道好多港僑喺英國開餐館，即使在最偏遠的地方，有時都會見到正體中文字。好似上個月去北愛爾蘭的小市鎮，就見會一間香港人開的酒樓。

兩日前，在街頭見到兩位華人面孔的公公婆婆，我對住佢地笑，婆婆又對住我笑，我就問佢：係唔係講廣東話。婆婆好開心，話係呀，我哋講廣東話架。佢哋姓李，原來李生喺度住咗六十幾年，希望將來可以同佢哋傾多啲偈，再識多啲港僑，留返個記錄。

執完垃圾，揸半個鐘頭車去咗一間living Museum，買一張票全年都可以參觀，我已經係第三次去，每次都有新發現。今日坐古老雙層巴士、舊式火車頭Billy，同埋參觀咗由Middlesbrough運到呢度重建的教堂。英國人對歷史真係好執著，起一條村出嚟保育東北地區的歷史，而且仲擴充緊。

喺度生活，真係有歷史感。