讀返書？

今日陪朋友去社區學院登記入學，等候的時間，看到對面寫住Aboriculture and Forestry，樹林和森林學，仲寫明歡迎報名，我見冇人登記，走埋去問下課程內容，大約就係樹藝課程，再加入農機農具操作，一星期返兩日，理論結合實習，兩年可以取得第三級文憑。我話我冇相關的專業技巧，只係自學實踐Permaculture，唔知有冇資格報讀。職員話任何人都可以，特別係我呢啲Mature student。我再問Am I too mature？佢笑笑口話：社區學院的學生好多係四十至六十歲，學習態度有些比年輕人還好。學費每年6000英鎊，同我當年讀博士的學費差唔多，但係我一直好想學樹木及森林學，真係有一刻不理後果咁去報讀。

職員好有耐性，問我攞晒資幫我check eligiblity，話我合資格申請student loan，如果我單身寡仔，我真係會報讀，但係現實問題，始終要留啲錢支持兩個仔，如果報讀咗，積蓄就少咗，而且兩年冇得搵正職，坐食山崩，唔知捱得幾耐。所以思前想後，都係冷靜啲，可能等下年蓄到啲錢先讀。

雖然如此，可以走訪一次社區學院，感覺好親切。當初搬到英格蘭東北，就是這邊多國家公園和農業經濟，即使只在春夏季可以去農場幫手，都好滿足。落車的時候，聞到一陣牛屎味，好似去返2018年在松代和松之山的感覺，好有親切感。

我已經報咗兩個公園的義工務服，主要係Gardening，希望有回音。耐心係一種練習，等候唔係乜都唔做，而係努力活在當下，但對未來開放。